世事无绝对，尤其係政策。明嘅，因时制宜！上周，中国连日出招救市，当中，人民银行、金融监管总局、证监会联合宣布「创设新的货币政策工具，支持股市稳定发展」，包括：创设证券、基金、保险公司互换便利（准向央行抵押债券、股票ETF等以获取资金投资股市）；创设股票回购、增持专案再贷款。另外，政治局拍板「要促进房地产市场止跌回稳」。前者一改自2006年以嚟嘅「严格禁止任何企业和个人挪用银行信贷资金直接或间接进入股市」嘅準则；后者亦一改自2017年以嚟嘅「房住不炒」嘅準则。政策无绝对，谂起漫画《圣斗士星矢》都描述过，宇宙只得光速同绝对零度係绝对嘅！

下载财经APP

美股外币即时报价 多国新闻任睇

国庆75周年临近，中港股市上周先升为敬，贺国家牛一。单睇港股，资金流入捞底，恍如牛一阶段；但趁高获利亦唔少。睇港股成交额，好有大时代feel：上周一（人行预告翌日有发布会），成交1,243亿元；上周二（人行新招犹如印银纸撑股市），成交2,424亿元；上周三（上海率先宣布派消费券），成交2,548亿元；上周四（政治局拍板救楼市），成交3,029亿元；上周五（传财政部拟发特别国债刺激消费及缓解地方债），成交4,457亿元破纪录！港股全周飙升2,373点或13%，收20632；10月夜期高水277点；ADR比例指数高水92点；追蹤美国上市中概股嘅金龙中国指数升4%。要留意係，恒指技术指标严重超买，短线有机回调。

今次政策市，可以炒几耐？今次係炒救市，货币政策已经出场，跟住要睇财政政策，财政部再增发专项债？全面减税降费？拭目以待！港股今轮升势，始于美国启动减息，叠加中国出招救市，环球热钱流向估值较低市场，而中港股市估值係环球主要市场中最低，当中，港股2024年预测市盈率约9倍，远低于日股嘅22倍、台股嘅18倍；外资、北水都见簇拥港股，港元资金需求上升，短期拆息抽升，港元滙价偏强，亦可佐证资金流入。券商普遍预计，港股估值修复行情，可延续至11月初美国大选前。上周之前，华尔街讲紧嘅「ABC」係「anything but China」，上周变成「all-in, buy China」，华尔街「捞底王」、对沖基金大佬David Tepper都话「buy everything in China」，又係世事无绝对！

本港上市嘅蓝筹中资科网股如ATM——阿里巴巴（9988）、腾讯（700）、美团（3690），连日上升，高追风险亦高；「中特估」股份如四大内银——建行（939）、工行（1398）、中行（3988）、农行（1288）则上周五大阴烛逆市回落，或因市场担心宽鬆政策继续超乎预期，令到盈利受压，因而趁高急沽。炒救市要小心，除咗要睇政策，仲要睇值博率。

内地料有提振消费政策跟尾，有利内需消费股，当中，蓝筹内需股蒙牛（2319）上周五曾急升25.2%，收升14.9%，报18.46元；惟以今年迄今计，仍累跌12.1%，係跌幅较大嘅内需股，具值博率，但升得太急，宜候回吐。上周四，内地7部门联合印发《关于促进肉牛奶牛生产稳定发展的通知》，鼓励地方通过发放消费券等方式拉动牛奶消费，以及推广「学生饮用奶」等，里昂发表报告指措施有助短期内提振销售，大和亦发表报告指有助加速供需正常化，两行都睇好蒙牛。

割柑人

本栏隔周一刊出