行街、睇戏、食饭係香港人嘅「直落」拍拖节目，不过新民党立法会议员何敬康周末夜晚去中环戏院睇戏，点知唔小心「包场」，得佢同老婆两个观众。佢噚晚同老婆再出动，终于遇到爆场嘅戏院，一齐撑港产片。

何敬康喺社交网站分享同老婆喺戏院嘅合照，原来係睇《破·地狱》嘅首映场。佢大讚係一套非常写实嘅港产片，黄子华同许冠文嘅表现好出色，不过佢话尤其欣赏卫诗雅嘅演出。原来佢咁讲係有「私心」㗎，同《am730》记者透露原来佢以前同卫诗雅嘅未婚夫係邻居，所以都认识卫诗雅，两对爱侣周不时出嚟食饭，知道卫诗雅用咗好多心机拍呢套戏，今次专登嚟捧场。

除咗两对爱侣嘅合照，睇返何敬康喺戏院打卡嘅相，原来有「彩蛋」，后面几排就係佢党友容海恩同老公袁弥昌，容海恩仲好趣緻举住「YEAH」手势「摄镜」。何敬康话係咁啱撞到，喺戏院楼下已经见到，真係有缘啦。

何敬康话睇过无数咁多嘅港产片，可以话係喺港产片薰陶下长大嘅一代，一定全力支持香港电影业。而香港曾经係「东方荷里活」，年产几百部电影，係巨星辈出、人才济济嘅娱乐梦工场。佢觉得香港只要有好戏，唔会冇人睇嘅！

原文刊登于 AM730 https://www.am730.com.hk/本地/ray-online-何敬康继-包场-睇戏后终遇-爆场-戏院撑港产片-自爆认识卫诗雅/499715?utm_source=yahoorss&utm_medium=referral