立法会议员周不时都带团参观议会，不过最近就引发一场风波。事缘立法会议员江玉欢带东欧咏春总会参观立法会，访客着住「中门大开」嘅咏春服饰。立法会主席梁君彦就发短讯，提醒议员同访客需要着商务衣饰以保庄重。

江玉欢最近喺社交网站分享带东欧咏春总会参观立法会，话好开心可以同总会嘅麦乐弼大师同弟子，以及咏春罗宾师傅见面，仲多谢佢哋送嘅《叶问宗师》英文版。对于梁君彦嘅短讯内容，江玉欢回应传媒查询嗰阵话，觉得只係一件小事，佢话事前唔知道访客嘅衣着，而咏春服装亦有内搭。但佢强调理解梁君彦嘅意思，之后会提醒访客着商务衣饰。

有报道话综合多个消息，包括工联会会长吴秋北在内，有唔止1个议员向梁君彦投诉，令到「大主席」要发温馨提示短讯。不过，吴秋北就喺社交网站发出严正声明，澄清冇举报任何人。佢又话明明係公开自爆嘅相片，使乜举报？「如是配合自製假新闻转移视线，便是沆瀣一气，自甘堕落！」

原文刊登于 AM730 https://www.am730.com.hk/本地/ray-online-传举报江玉欢带无穿商务衣饰访客游立会-吴秋北反驳-公开照片何需举报-/500468?utm_source=yahoorss&utm_medium=referral